විද්‍යාකර බාලිකා විද්‍යාලයේ ප්ලාස්ටික් සයිකල් දැනුවත් කිරීමේ සැසිය

ජෝන් කීල්ස් සමූහ ව්‍යාපාරයේ Plasticcycle, මහරගම ප්‍රාදේශීය ලේකම් කාර්යාලයේ ආරාධනය පරිදි, විද්‍යාකර බාලිකා විද්‍යාලයේ සිසුවියන් 900 කට අධික පිරිසක් වෙනුවෙන් පසුගියදා විශේෂ දැනුවත් කිරීමේ වැඩසටහනක් පැවැත්වී ය. Plasticcycle ප්ලාස්ටික් අපද්‍රව්‍ය එකතු කිරීමේ බඳුන් සඳහා ප්‍රධාන අනුග්‍රාහකයා ලෙස කටයුතු කරන Elephant House Beverages සහ, ප්‍රතිචක්‍රීකරණ සමාගමක් වන Eco Spindles (පුද්.) සමාගම යන සමාගම් වලද දායකත්වය සමගින්, 2022 අගෝස්තු 24 වන දින මෙම දැනුවත් කිරීමේ වැඩසටහන පවත්වන ලදි. ප්ලාස්ටික් මගින් සිදුවන පරිසර දූෂණය සහ, 4Rs (Refuse, Reduce, Reuse සහ Recycle) සංකල්පය ප්‍රයෝගිකව ක්‍රියාවට නැංවීම තුළින් පරිසරය ආරක්ෂා කරගැනීමට දායක විය හැකි ආකාරය පිළිබඳව මෙහිදී එම සිසුවියන් දැනුවත් කෙරිණි.

6/7 ශ්‍රේණි සහ 8/9 ශ්‍රේණි සඳහා වෙනම සැසි දෙකක් වශයෙන් මෙම වැඩසටහන පවත්වන ලදි. එහිදී Plasticcycle, Elephant House සහ Eco Spindles නියෝජිතයන් ඉතාමත් සුහදශීලී සහ ආකර්ෂණීය ලෙස, සිසුවියන්ද සම්බන්ධ කරගනිමින් වැඩසටහන මෙහෙයවූ අතර, එහිදී ප්‍රශ්න විචාරාත්මක වැඩසටහන් සහ තරගද පවත්වන ලදි. එමෙන්ම වගකීම් සහගත ලෙස ප්ලාස්ටික් අපද්‍රව්‍ය බැහැර කිරීම දිරිමත් කිරීම සඳහා පාසලට Plasticcycle අපද්‍රව්‍ය බඳුන් දෙකක්ද පරිත්‍යාග කරන ලද අතර, මෙමගින් පාසලේ නිතර භාවිතා වන PET බෝතල්, HDPE ඇසුරුම් සහ ප්ලාස්ටික් මූඩි වැනි දේවල් විධිමත් ලෙස බැහැර කිරීමට අවස්ථාව ලැබෙනු ඇත.